எம்பி பதவியா?

காங்கிரஸ் கட்சியில் சேர்ந்த குஷ்புவுக்கு, ராஜ்யசபா எம்.பி பதவி வழங்க கட்சித் தலைமை முடிவெடுத்துள்ளதற்கு, கடும் எதிர்ப்புகள் எழுந்துள்ளது.

நடிகை குஷ்பு, காங்கிரசில் சேர்ந்த பின் அவரது வேகமான நடவடிக்கைகள் கட்சி மேலிடத்துக்கு பிடித்து விட்டதால், அவருக்கு செய்தி தொடர்பாளர் பதவி வழங்க திட்டமிட்டுள்ளனர். இதற்கிடையில் குஷ்புவுக்கு, மகாராஷ்டிர மாநிலம் மூலம் ராஜ்யசபா எம்.பி பதவி வழங்க வேண்டும் என முகுல் வாஸ்னிக், கட்சி மேலிடத்திற்கு பரிந்துரைப்பதாக தகவல் பரவ, அதற்கு தமிழகத்தில் இருக்கும் காங்கிரஸ் கோஷ்டி தலைவர்கள் பலரும் கடும் எதிர்ப்பு தெரிவித்துள்ளதாக தகவல்கள் வெளியாகியுள்ளது. இதுகுறித்து கட்சி வட்டாரங்களில் கூறப்படுவதாவது, கட்சி இன்று இருக்கும் நிலையில் குஷ்பு போன்றவர்கள் கட்சிக்கு மிகவும் அவசியம் தான். அதற்காக, அவருக்கு கட்சியில் கூடுதல் முக்கியத்துவம் கொடுத்தால், கட்சியில் கடும் அதிருப்தி ஏற்படும். இது தெரியாமல் கட்சி தலைமையில் இருந்து, குஷ்புவுக்கு ராஜ்யசபா எம்.பி பதவி வழங்க முற்படுகின்றனர். இது இத்தனையாண்டு காலமும் கட்சிக்காக உழைத்த தலைவர்களின் உழைப்பை அவமதிப்பது போலாகிவிடும். அதனால் நடிகை குஷ்புவுக்கு எம்.பி பதவியெல்லாம் கொடுக்கக்கூடாது என அவர்கள் கடும் எதிர்ப்பு தெரிவித்துள்ளனர்.